Día das Letras Galegas 2014: Viñetas para todas e todos
O sábado, coma cada 17 de maio dende hai 51 anos, celebramos o Día das Letras Galegas, e con fachenda vemos como cada vez son máis os títulos de banda deseñada dispoñibles en galego, ben feitos por autores e autoras de aquí, ben traducidos de clásicos estranxeiros. E o mellor de todo é que agardamos que este número non deixe de medrar. Polo momento, aquí vos deixamos as nosas suxestións para os distintos tipos de lectores e lectoras que adoitan visitar Komic Librería...
Para @s máis cativ@s
Marcopola, a illa remeira
Jacobo Fernández Serrano
Xerais
As imaxinativas aventuras de Marcopola, unha illa que un bo día decide ir explorar novos mares onde fará novos amigos e vivirá unha chea de emocionantes acontecementos.
Para a xente nova con ganas de explorar
Silvana, a filla do explorador
Ramón Marcos / Jorge Castelli
El Patito Editorial
A nosa protagonista é unha espilida e rebuldeira rapaza, filla dun famoso explorador, que vive grandes aventuras nos dous tomos que ata o de agora foron publicados desta serie.
Para @s amantes do xénero histórico
Os lobos de Moeche
Manel Cráneo
Demo Editorial
Unha boa mostra da bd histórica galega é o que nos achega o polifacético Manel Cráneo nesta obra, onde aborda as revoltas irmandiñas que se viviron en Galicia no século XV.
Para @s que queren coñecer outras realidades
Persépole
Marjane Satrapi
Rinoceronte Editora
Unha das obras máis salientables da bd europea dos últimos tempos, nunha gran tradución á nosa lingua, onde a autora conta a súa infancia e adolescencia en Irán, un país que pasou de estar socialmente moi avanzado nos setenta a xusto o contrario nos anos seguintes.
Para @s que queren celebrar o Día das Letras con letras
Lois Pereiro. Breve encontro
Jacobo Fernández Serrano
Xerais
A biografía gráfica do poeta monfortino, dende o seu nacemento ata o seu pasamento, con especial atención aos seus poemas e ás súas influencias, escrita e debuxada de xeito maxistral e con moitísimo agarimo por Jacobo Fernández.
Para as persoas adultas que non deixaron de soñar
Ardalén
Miguelanxo Prado
El Patito Editorial
Unha obra preciosa e poética sobre os mecanismos da memoria, cos estilos pictórico -no gráfico- e realista máxico -no narrativo- característicos de Miguelanxo Prado.
Para a xente nova con moita formación
pero poucas expectativas de emprego
Punto de Fuga
Miguel Cuba
Demo Editorial
As dificultades que ten un licenciado cunha extensa formación para integrarse no mercado laboral nunha obra realista, fresca e optimista ambientada en Santiago.
Para quen queira saber máis sobre
un dos nosos maiores xenios
Colección Castelao
Inácio / Iván Suárez
Demo Editorial / Komic Librería
A vida e obra do ilustre humanista rianxeiro, moi ben documentada e estruturada por Inacio e plasmada fermosamente co debuxo de Iván. Ata o de agora sairon do prelo tres tomos autoconclusivos -Titoán, O pobre tolo e Máis alá!- tratando distintos momentos da súa biografía. Unha lectura moi agradable e mesmo necesaria.
Para @s que aman o xénero negro
Os días do cometa
Manolo López Poy / Miguel Fernández
Demo Editorial
Tras o éxito da súa primeira obra xuntos, O fillo da furia, este tándem creativo lugués cativounos con todo un thriller ambientado na Galicia rural de mediados dos oitenta onde se mesturan intrigas políticas, axustes de contas e acción cun ritmo trepidante.
Para @s clásic@s con bo gusto
Contrato con Deus
Will Eisner
Rinoceronte Editora
Unha das mellores obras dun dos autores capitais na historia da novena arte, que nas catro historias que forman este tomo reproduce como era a vida na Nova York de inicios do século XX, cunha elegancia e unha mestría tremendas.
Para @s interesad@s no xénero documental
Gorazde
Joe Sacco
Rinoceronte Editora
Sacco, correspondente de guerra na guerra que asolou os Balcáns nos noventa, dálle voz á xente que coñece durante a súa estadía pola ex-Iugoslavia, construíndo un relato denso e duro, pero moi necesario.
Para @s nen@s de 8 a 99 anos
Fiz nos biosbardos
Kiko Da Silva
BD Banda
Fiz é un neno normal, totalmente normal, normaliño de todo... se exceptuamos as súas grandes habilidades escatolóxicas, como o seu dominio no arte de modelar os mocos ou a gran relación de amizade que traba coas súas propias deposicións... Divertidísima obra que tras varios anos esgotada volve aos nosos andeis coa frescura e o humor de sempre.