La búsqueda del Pájaro del Tiempo: o retorno dun gran clásico

09/12/2013

Sorprendéunos Norma Editorial coa magnífica edición en formato integral que vén de sacar do prelo de La búsqueda del pájaro del tiempo, un clásico que en Komic Librería sempre consideramos obra cumio do xénero épico-fantástico.

Realizada na década dos oitenta pola parella creativa creativa Le Tendre-Loisel e publicada anteriormente en España en catro álbumes da colección Cimoc ExtraColor, sempre foi moi aprezada polo público e unha referencia a nivel comercial ata a súa descatalogación.

En 1999 Norma comezou a publicar unha precuela, que aínda está por rematar, e anunciou que reeditaría este integral que ao final se fixo agardar máis da conta. Pero pagou a pena a espera e agora saborearemos este fermoso tomo que se pon á venda a un prezo moi axustado.

Se ben podemos dicir que o guión está compensado, xa que distribúe acción e narración de xeito equilibrado ao longo das catro partes, o debuxo de Loisel teremos que cualificalo como absolutamente fascinante. Non é tan só un alarde de imaxinación e personalidade, senón que tecnicamente resulta insuperable.

A nova cor neste caso mellora á que xa coñeciamos, e contribúe ao goze visual que supón percorrer estas paisaxes fantásticas xunto ao grupo de protagonistas aos que, ao longo dos nove días nos que transcorre a acción, apenas vemos comer ou durmir. Un deles, nun intre determinado, di o seguinte: «Oh, a rutina de sempre. Pelexas, persecucións,cansazo, fame, pés xeados, golpes e reconciliacións. Sen esquecer, claro está, unha pinga...ou dúas, de erotismo. En fin, unha pequena epopeia e grandes miserias». E nada pode definir mellor o que nos imos atopar ao longo das duascentas e pico páxinas desta obra.

Para completar a edición, Norma agasállanos cunhas páxinas da primeira versión que debuxara Loisel no ano 1975, e que en 1982 refixo para os dous primeiros álbumes da serie, e cunha sobrecuberta despregable sen textos que sirve para aprezar a mestría deste veterano autor en todo o seu esplendor.

La búsqueda del Pájaro del Tiempo (Integral)
Serge Le Tendre / Régis Loisel

Norma
Tomos: 1