Come Prima, de Alfred: unha viaxe fraternal cara a memoria
Obter a Fauve d'Or (premio á mellor obra do ano) no Festival de Angoulême é unha das maiores recompensas ás que pode aspirar un autor europeo, unha honra e un empurrón á súa carreira profesional. Para o lector, afeccionado e comprador habitual de bd este premio supón unha garantía de calidade, malia non conlevar sempre un entusiasmo enorme pola obra ou polo seu autor.
Para nós non pasaron desapercibidos nin nos deixaron indiferentes os anteriores traballos de Alfred editados en España: Por qué he matado a Pierre (con guión de Oliver Ka, Ponent Mon) e No moriré cazado (Astiberri), en ambos os dous casos historias realistas e dramáticas que non chegaban ao preciosismo gráfico da obra que hoxe nos ocupa.
En Come Prima dous irmáns de orixe italiana inician unha viaxe despois de dez anos sen verse. A acción está situada en torno a 1960. Diríxense nun pequeno Fiat 500 dende Francia ata a súa vila natal. Serán centos de quilómetros e moitas as lembranzas que compartiremos con estes dous personaxes de caracteres opostos forzados a reencontrarse por motivacións ben distintas.
O autor dosifica con precisión e ritmo constante a información que precisamos, e alterna a acción presente con flashbacks nos que emprega un estilo menos detallado, máis pictórico, moi axeitado ao que se vai rescatando da memoria da infancia e da mocidade dos protagonistas.
Un dos puntos fortes de Come Prima é a confortable sensación da viaxe coma unha sucesión de bucólicas paisaxes mediterráneas e alpinas, vilas preindustrais tratadas de xeito exquisito tanto no debuxo coma na cor. Créase un forte contraste entre a placidez que se transmite así e as situacións de tensión, e mesmo violencia, entre os dous irmáns. Os afeccionados ao cine inevitablemente atoparán referencias ao costumismo e ao neorrealismo italiano que aquí se traslada á linguaxe secuencial.
Ante un galardón desta envergadura podemos asegurar que nos enfrentamos a unha boa lectura, aínda que sempre nos quedará a dúbida de se habería outro título do ano publicado no mercado francés que nos puidera ter gustado aínda máis.
Come Prima
Alfred
Salamandra Graphic
Tomos: 1