Tramp, de Kraehn e Jusseaume: un longo periplo de tensión, violencia e decisións equivocadas
Falámosvos hoxe de Tramp, magnífico tomo integral enmarcado no xénero de aventuras con tintes históricos. Unha agradable e satisfactoria sorpresa que se converte nunha emocionante e moi recomendable lectura ambientada a mediados do século XX.
Julian de Trinchére é un ancián armador francés con graves problemas de saúde. Atopámonos en 1949, e tras a Segunda Guerra Mundial moitas navieiras sofren a competencia de compañías estadounidenses. A de Trinchére non é unha excepción, é máis, a súa situación financeira é catastrófica.
Desacougado polo futuro da súa única filla discapacitada ao vello empresario asáltao unha diabólica idea que serviría para deixar nunha folgada situación económica á súa herdeira. Negocia a compra dun mercante desfeito coa intención de facelo desaparecer e cobrar a prima do seguro, para isto precisará dun bo número de colaboradores sen escrúpulos, xa que logo a tripulación e mais o capitán deberán necesariamente desaparecer no afundimento do barco para que un único supervivente testemuñe o máis axeitado para os intereses do armador.
Así comeza a trama do primeiro do catro álbumes realizados entre 1993 e 1999 que recolee este tomo integral. A lectura desta obra, cualificada de thriller marítimo, supón unha extraordinaria descoberta para os lectores españois, tanto pola precisión da súa factura, como polo seu impecable ritmo ou a súa coidada documentación histórica. Precisamente este último é un dos aspectos salientables de Tramp (termo marítimo que define a un buque sen itinerario nin carga definidos), xa que o «Belle Hélène», que así se chama o mercante, emprenderá un periplo que o levará da costa occidental africana ata o Caribe, facendo escalas en Guinea-Conakry e en moitos portos do mar das Antillas e do Golfo de México.
O xove capitán Jan Calec, sobre o que recae o peso da aventura, verase obrigado a pasar unha tempada en terra condenado pola xustiza colombiana. É neste intre cando se aportan máis datos sobre a situación política do país, aínda que ao longo dos catro álbumes son numerosísimos os detalles documentados, sobre todo a través do debuxo, que contribúen a dotar de realismo e credibilidade o relato.
Moi ben plantexado, desenvolto e ben pechado, este ciclo deixa en nós moitas ganas de coñecer os novos retos aos que terá que facer fronte Jan Calec no futuro.
Así pois estamos ante un dos moitos integrais de xénero histórico e de aventuras que Ponent Mon publicou durante 2014 (moitos dos cales pasarán proximamente á nosa sección de moi recomendados), que ademais nos deu a oportunidade de coñecer a estes autores dos que non tiñamos excesivas referencias editadas no noso país.
Tramp (Integral 1)
Kraehn / Jusseaume
Ponent Mon
Tomos: 1