Zorglub #1. La hija de Z, de José Luis Munuera: aventuras espectaculares para tódolos públicos

Komic Librería: Zorglub #1. La hija de Z


Os afeccionados ás aventuras de Spirou non podiamos ter comezado mellor este 2018 (ano no cal o popular e afouto botóns celebra, atención, o seu oitenta aniversario), xa que paseniñamente a arriscada e decidida aposta de Dibbuks por ir editando todo o material deste personaxe vaise convertendo nunha realidade que, por exemplo, deixounos dúas boas mostras nas últimas semanas: por unha banda a publicación de La mujer leopardo, un magnífico álbum obra de Yann e Olivier Schwartz do cal vos falaremos nos vindeiros días, e pola outra a fulgurante irrupción desta nova serie, Zorglub, unha estupenda historia de aventuras na que o español José Luís Munuera dá renda solta a todo o seu talento.

Komic Librería: Zorglub #1. La hija de Z

Nado en 1972, este murciano leva toda a súa carreira a traballar para o esixente mercado francés dende que fixera o seu debut, hai máis de dúas décadas, coa serie Los Potamoks, guionizada nin máis nin menos que por Joann Sfar. O seu estilo, de trazo limpo e tremendamente dinámico, está influenciado por autores do nome de Giraud, Uderzo ou Otomo, resulta moi espectacular e puidémolo aprezar en títulos como El juego de la luna e Walter el lobo ou series como Los Campbell, Navis ou Sortilegios. Entre os anos 2004 e 2008 mesmo chegou a ser o debuxante da colección regular de Spirou y Fantasio, período durante o cal ilustrou catro álbumes escritos polo veterano Jean-David Morvan.

Komic Librería: Zorglub #1. La hija de Z

Estos antecedentes como parte da selecta nómina de autores que deron vida ás historias do mozo aventureiro, xunto coas súas innegables virtudes, ben como narrador, ben como ilustrador, converten a Munuera no nome ideal para afrontar o reto de comezar unha nova serie, centrada nun dos principais antagonistas de Spirou: Zorglub, o malvado científico tolo tan trapalleiro como xenial.

Komic Librería: Zorglub #1. La hija de Z

Este megalómano inventor aparece aquí tratado dun xeito máis fondo que en relatos anteriores, coñeceremos máis, moito máis, a súa personalidade e os seus conflitos internos e, sobre todo, descubriremos a Zandra, a súa filla. Unha rapaza de dezaseis anos que non leva moi ben iso de ter un pai quitado dun filme de James Bond e que o único que quere é ter unha vida normal, ao mesmo tempo que o seu proxenitor empeza a ter problemas para aceptar o rápido que medrou a súa cativa e adaptarse á súa adolescencia.

Komic Librería: Zorglub #1. La hija de Z

Este conflito paterno-filial vaise ver dinamitado pola aparición dunha facción secreta do exército coa cal ten negocios Zorglub e as súas arelas por controlar un dos xeniais inventos do imaxinativo científico. A persecución militar saca á luz un sorprendente segredo que afecta directa e especialmente a Zandra, que terá que dixerir todo isto mentras trata de escapar e salvar á súa familia.

Komic Librería: Zorglub #1. La hija de Z

Unha historia chea de emoción, humor e acción que vos recomendamos vivamente, sexades seguidores habituais das aventuras de Spirou ou non, e que estamos certos de que vos vai gustar por igual tanto ao público novo como ao adulto.


Komic Librería: Zorglub #1. La hija de Z

Zorglub #1. La hija de Z
José Luis Munuera

Dibbuks
Tomos: 1