DESTINO SANTIAGO, de Helder Rodrigues (Demo): camiñando con sinceridade e humor.
Temos comentado en varias ocasións que resulta curioso o
escaso número de bandas deseñadas que tratan a temática xacobea, sobre todo se
temos en conta a morea de ensaios, guías ou documentais que hai sobre o Camiño
de Santiago.
Este reducido número de “obras peregrinas” aumenta con Destino Santiago, un álbum editado por
Demo hai unhas semanas e co cal descobremos así mesmo o traballo do seu autor,
Helder Rodrigues, un artista gráfico portugués cunha extensa traxectoria nos
eidos da ilustración, deseño e animación que decidiu empregar as viñetas para
nos achegar a súa propia experiencia tras percorrer o Camiño do Norte.
Malia a súa cativa experiencia no medio –outro título
autoeditado en alemán é a súa única bagaxe no mundo do cómic- o resultado final
é unha lectura fluída e moi, moi fresca, na cal Helder bota man do seu talento
para a secuenciación e de ter vivido o que nos conta en primeira persoa para
construír un relato interesante e divertido a partes iguais.
Con sinceridade, humor e unha certa inocencia vainos contar o
seu camiño dende o momento que toma a decisión de facelo, nun intre de crise
existencial e, sobre todo, laboral. De
xeito moi xeneroso vai compartir connosco os seus triunfos e fracasos, as súas
dúbidas, os seus atrancos –especialmente físicos- ou as distintas maneiras nas
cales a realidade desmente ou confirma as ideas preconcebidas coas que comeza a
ruta en Irún. Ademais de, por suposto,
permitirnos asistir aos encontros que ten con outros peregrinos ou as paisaxes
polas que camiña.
Xa que logo aquí vos deixamos esta recomendación, un particular, honesto e dinámico caderno de viaxe sobre o Camiño que o propio Helder Rodrigues presentará e asinará na nosa librería o vindeiro venres 4 de febreiro a partires das 18:00 horas. Agardámosvos!!!