Top 10 de Komic Librería: Selección de novidades editadas en abril de 2014
O pasado abril, coa celebración do Día do Libro e o recente Salón do Cómic de Barcelona, resultou especialmente prolífico en lanzamentos editoriais. Como cada mes, seleccionamos as novidades que máis nos chamaron a atención e presentámosvolas no noso particular Top 10.
10
Tyler Cross
Fabien Nury / Brüno
Dibbuks
Un novo exemplo do xénero negro, onde o trazo groso do debuxo de Brüno ilustra esta historia ambientada nos anos 50 que tamén ten moito de western, con numerosas referencias cinematográficas e literarias entre as que destacan os filmes de Peckinpah ou dos irmáns Coen e as novelas de Dashiell Hammett.
09
Resaca
Mamen Moreu
Astiberri
Divertidísima e gamberra primeira obra longa desta autora (e libreira) aragonesa, protagonizada por Marcela, unha rapaza de vintetantos que esquiva a crise dos trinta a base de festa e descaro.
08
Whaligoë
Yann / Virginie Augustin
Yermo Ediciones
Unha bonita homenaxe á literatura decimonónica anglosaxona, cun relato firmemente escrito no que teñen cabida os espíritos, as intrigas e o romanticismo, como se dunha novela das irmás Brontë se tratara.
07
Solos
Fabien Vehlmann / Bruno Gazzotti
Dibbuks
As aventuras de cinco nenos moi distintos nun mundo no que, dun día para outro, desaparecen todos os adultos. Realismo, misterio e acción cun ritmo dinámico e trepidante nesta mestura de Os Cinco con O señor das moscas.
06
Murena #9
Jean Dufaux / Philippe Delaby
Planeta DeAgostini Cómics
Outro número máis, e xa van nove, desta bd histórica ambientada na Roma de Nerón onde podemos observar as consecuencias do pavoroso incendio que asolou a cidade. Debuxo sobrio e clásico xunto cun guión moi traballado e documentado fan desta serie un dos mellores exemplos actuais do xénero histórico.
05
Los Campbell #1
José Luís Munuera
Dibbuks
Primeira entrega desta serie de aventuras dirixida cara o público xuvenil pero moi recomendable tamén para os adultos. Un pirata retirado e as súas fillas son os protagonistas deste relato no que a acción, o humor e o arrecendo do Caribe enchen todas as páxinas.
04
Building stories (Fabricar historias)
Chris Ware
Random House Mondadori
Unha marabilla absoluta, unha xigantesca caixa de lembranzas chea de sorpresas e metáforas, feita con moitísimo gusto, coa que nos agasalla o xenial autor norteamericano.
03
Come Prima
Alfred
Salamandra Graphic
Premiada coa Fauve d'Or á mellor obra no pasado Festival de Angoulême, esta novela gráfica conta a viaxe de dous irmáns de orixe italiana dende Francia ata a súa vila natal nos anos cincuenta. Podedes ler o que dela falamos nesta ligazón.
02
Las oscuras manos el olvido
Seguí / Hernández Cava
Norma Editorial
Un maxistral relato de xénero negro co conflito vasco de pano de fondo e da que vos falamos hai uns días na nosa páxina (podedes ler o correspondente artigo aquí).
01
La entrevista
Manuele Fior
Salamandra Graphic
Unha fermosísima e sorprendente historia sobre o amor, as relación sociais e as cousas que realmente importan... Marabillosa nova obra do autor de La señorita Else e Cinco mil kilómetros por segundo que xa consideramos unha das nosas preferidas dos últimos anos. Tedes máis información neste artigo.