Top 10 de Komic Librería: Selección de novidades editadas en maio de 2015
Aquí estamos de novo, coa nosa habitual selección mensual dos títulos que máis nos gustaron entre os que chegaron estas últimas semanas á nosa librería. Un TOP 10 no que teñen cabida todo tipo de estilos, xéneros e procedencias, e que agardamos vos sexa de utilidade.
10
Dad #1 - Niñas de papá
Nob
Dibbuks
A nova obra do autor da exitosa serie Marieta, que desta volta presenta as aventuras e desventuras, contadas con humor e tenrura, dun pai con catro fillas de catro nais distintas que debe educalas e sacalas adiante ao tempo que continúa coa súa carreira como actor.
09
Dédalus en Compostela
Fernando Iglesias –Kohell
Deputación de Ourense + Fundación Vicente Risco
A estupenda adaptación que Kohell fai do texto de Vicente Risco, no que vemos ao escritor ourensán a departir e filosofar con Stephen Dédalus (o alter ego de James Joyce) mentras pasean polas rúas de pedra da cidade compostelá.
08
La isla de las mujeres
Zanzim
Dibbuks
Céleste Bompard é un piloto que na Primeira Guerra Mundial chega ata unha illa deserta tras ser derribado. Un bo día descubre por casualidade que o interior da selva do seu novo fogar oculta unha sociedade matriarcal formada exclusivamente por mulleres. Ironía, humor, aventuras e amor, moito amor, nesta simpática historia debuxada cun estilo atractivo e dinámico.
07
La furia
Los Bravú
Apa-apa
A nova obra dunha das nosas parellas preferidas, un relato curto cheo de violencia gratuíta protagonizada por un trío que viaxa ata a Praia para arrasar cos estereotipos. Unha viaxe frenética co toque único e característico de Dea e Diego.
06
Las aventuras de Joselito
José Pablo García
Reino de Cordelia
Toda unha sorpresa esta biografía sobre o neno prodixio que se convertiu nun fenómeno mundial, un artista infantil que viu como o tempo e as malas decisión apagaban a súa estrela. A súa ascensión e posterior caída aparece aquí contada nun alarde técnico por parte do seu autor, que emprega un estilo gráfico distinto en cada capítulo (da liña underground á escola Bruguera, pasando pola tira gráfica, o manga ou por pioneiros como Töpffer ou McCay).
05
Havarti party
Roberta Vázquez
Fosfatina
Unha historia sobre a amizade, a música e os problemas que pode acarrear voltar aos lugares nos que se foi feliz, protagonizada polos animais antropomórficos saídos do fanzine Bob y amigos. Unha boa mostra do traballo da compostelá Roberta Vázquez do que xa vos falamos hai uns días.
04
Ciudad
Juan Giménez / Ricardo Barreiro
Astiberri
Trinta e tres anos despois da súa publicación reedítase en formato integral esta fantástica historia de ciencia-ficción na que o seu protagonista, Jean, vaise ver transportado a unha cidade sen nome onde as regras e a lóxica non teñen lugar. Co excelente debuxo en branco e negro de Giménez volve aos nosos andeis este clásico dos oitenta polo que o tempo non pasa nada mal.
03
Cráneo de azúcar
Charles Burns
Reservoir Gráfica
A agardadísima conclusión da triloxía que comezou con Tóxico e proseguiu con La Colmena, e onde o autor de Agujero negro volve demostrar a súa mestría para crear situacións desacougantes nunha historia que abala entre a realidade e o soño, con homenaxes tintinófilas polo medio e moitas preguntas que atopan resposta neste derradeiro tomo.
02
Pistuví
Merwan / Bertrand Gatignol
Spaceman Books
Un libro dunha abraiante e tremenda fermosura gráfica que resulta ser unha metáfora sobre o paso do tempo e as dificultades para asumir as mudanzas que isto produce. Unha fábula evocadora protagonizada por un pequeno raposo e unha nena nun país cheo de paxaros que xa comentamos na nosa páxina.
01
Atila
Inacio / Iván Suárez
Demo Editorial + Komic Librería
O cuarto volume da biografía gráfica de Castelao, o primeiro situado na Guerra Civil, e do que podedes atopar máis información aquí. Atopamos ao ilustre rianxeiro en Barcelona no ano 38, e ao refuxiarse dos bombardeos da aviación italiana sobre a cidade condal lembra a súa nenez en Arxentina. Documentación e imaxinación únense a un coidado debuxo neste proxecto, un dos máis interesantes da banda deseñada galega actual.