Los ignorantes: Davodeau espido
A última obra de Etienne Davodeau parte dun plantexamento orixinal e atrevido do que dubidabamos moito, mesmo coñecendo a fondo a nada errática traxectoria do autor francés. Este prexuízo desaparece en canto se le o primeiro capítulo (trinta páxinas), no que xa aprezamos a fórmula que, ademais de novidosa, resulta efectiva.
Na primeira páxina Davodeau propón a Richard Leroy, un bo amigo viticultor que case non leu cómics, traballar gratis nas súas viñas, que lle explique o que acontece na súa adega e que o inicie na degustación do viño, en troques el ofrécese a descubrirlle o mundo da bd, facilitándolle lotes para ler, visitando autores, editores, festivais...
Isto suporá un ano enteiro de convivencia que nos vai servir aos lectores que non sabemos moito sobre o viño para coñecer todo o proceso da súa elaboración: veremos tanto o traballo do campo (a poda, o coidado da viña, a vendima…) como o da adega, ou mesmo o aspecto máis comercial. Á vez, os que descoñecen o universo comiqueiro descubrirán os múltiples xeitos que teñen os autores de afrontar o seu traballo, como funciona unha editorial, unha imprenta ou a organización dun festival.
En fin, un ano dá para moito e moito recibimos tamén das case trescentas páxinas deste tomo editado por La Cúpula, e que desparece dos andeis da nosa librería tan rápido como o faría unha das tantas botellas de bo viño que desfilan por Los ignorantes.
Los ignorantes
Étienne Davodeau
La Cúpula
Tomos: 1